vestfirskar fréttir | bb.is | 17.03.03 | 08:55



Dauðir fuglar finnast víða við Ísafjarðardjúp og í Jökulfjörðum

Þorleifur Eiríksson hjá Náttúrustofu Vestfjarða segir að nokkuð hafi fundist af dauðum fuglum inn um Djúp og allt vestur um til Ísafjarðar og eitthvað hafi fundist í Jökulfjörðunum líka. „Þetta er ekki mjög mikill fugladauði, það varð meira vart við þetta í fyrra. Þessir fuglar eru allir mjög horaðir en við tókum sýni úr stuttnefjum inn í Ísafirði og þau eru á leiðinni til Náttúrufræðistofnunar til greiningar. Við viljum ganga úr skugga um hvort eitthvað grunsamlegt sé hér á ferðinni en sennilega eru fuglarnir einfaldlega að drepast úr hor“, segir Þorleifur. Í gær fundust fimm fuglahræ, sennilega af langvíum, inni í Skutulsfjarðarbotni í fjörunni rétt innan við brúna yfir Tunguá.

Þorleifur segir talsvert mikið af fuglum hafa fundist á þessum slóðum í fyrravetur. „Ein hugmynd sem hefur verið varpað fram er að ætið færist til þannig að fuglinn missir af því en svo þegar hann er kominn inn á grunnslóð þar sem er æti, þá hafi hann hreinlega ekki afl til að til að kafa og veiða“, segir Þorleifur.

Hræin eru sum hver illa leikin en Þorleifur segir hrafna, máva og minka kroppa í þau og gera sér að góðu. „Þau ættu að vera horfin mjög fljótlega“, sagði hann.