Sameinast um að fjölga störfum í náttúruvísindum á landsbyggðinni
 

Dr. Þorleifur Eiríksson við manngerða músabyggð á Náttúrustofunni í Bolungarvík.

Dr. Þorleifur Eiríksson, forstöðumaður Náttúrustofu Vestfjarða í Bolungarvík, segir að með tilkomu stofnunarinnar hafi störfum í greinum náttúrufræða fjölgað á svæðinu. Nú starfa þar þrír sérfræðingar auk tveggja aðstoðarmanna. Þorleifur er stjórnarmaður í Samtökum náttúrustofa (SNS) en á aðalfundi samtakanna sl. föstudag settu þau sér það markmið að fjölga störfum í náttúruvísindum á landsbyggðinni. Þorleifur segir náttúruna vera um allt land og því sé engin nauðsyn til þess að rannsóknir í greininni fari að mestu fram á Reykjavíkursvæðinu. „Náttúrustofurnar eru litlar stofnanir en við höfum sett okkur að vinna náið saman og deila með okkur fólki og verkefnum til að vinna á vanköntum sem því fylgir. Þannig getum við tekið að okkur fleiri og stærri verkefni“, segir Þorleifur.

Náttúrustofa Vestfjarða fær árlegt 10 milljóna króna framlag frá ríki og sveitarfélögum en auki hefur hún tekjur af útseldum verkefnum. „Áður en stofnunin var sett á laggirnar voru engar náttúrufræðirannsóknir stundaðar á svæðinu. Ef ungmenni ákvað að læra t.d. líffræði var það nánast að dæma sig úr leik að starfa á landsbyggðinni. Vonandi tekst okkur að breyta þessu. Verkefnin eru næg allt í kringum okkur og engin ástæða til að rannsóknarleiðangrar frá Reykjavík vinni þau. Enda er farið að gera auknar kröfur um rannsóknir á sviði náttúruvísinda og verkefnin að aukast, meðal annars vegna nýrra krafna frá ESB. Þessi starfsemi getur því aukist verulega á landsbyggðinni án þess að verið sé að taka atvinnu af fólki á höfuðborgarsvæðinu“, segir Þorleifur.

Samstarf milli landshluta er mikið og segir Þorleifur að ekkert sé því til fyrirstöðu að stunda rannsóknir á öllum sviðum náttúrufræða í Bolungarvík. Stofnunin hafi t.d. sótt jarðfræðiþekkingu til starfsmanna hjá Náttúrustofunum í Vestmannaeyjum og á Sauðárkróki. Sjálfur vinni hann úr skordýrarannsóknum fyrir Náttúrustofu Austurlands en sendi til baka fléttur og önnur gróðursýni þar sem forstöðumaðurinn eystra sé grasafræðingur. „Fyrir vikið eru þessar litlu stofnanir stórar saman og geta skilað fyrsta flokks vinnu. Nú þegar erum við í stórum samstarfsverkefnum hér heima og erlendis, sem enginn þessara aðila hefði getað komið inn í einn og sér.“

„Það þýðir ekkert fyrir okkur úti á landi að sitja og bíða. Nú þegar er kominn hjá okkur vísir að þessum geira og við verðum að halda áfram að byggja hann upp í kringum okkur“, sagði dr. Þorleifur Eiríksson.