Natturustofa Vestfjarda

Nú í lok desember kom út fyrsta tölublað Tímarits um menntarannsóknir. Tímarit þetta er gefið út af FUM, sem er félag um menntarannsóknir á Íslandi og skal tímaritið helgað rannsóknum á því sviði. Þetta fyrsta tölublað byggir að mestu á erindum og fyrirlestrum sem haldnir voru á fyrstu ráðstefnu félagsins sem haldin var 22. nóvember 2003.

Meðal greina í tímaritinu er grein eftir Önnu Guðrúnu Edvardsdóttir, deildarstjóra þróunardeildar Náttúrustofu Vestfjarða sem ber yfirskriftina "Er gildismat íslenskra skólastjóra ólíkt eftir kynferði? Greinin byggir á rannsóknarverkefni Önnu Guðrúnar sem lagt var fram til fullnaðar M.Ed.-prófs við Kennaraháskóla Íslands 2002 (útdráttur).

Hermann Þorsteinsson fann stórt og fallegt fiðrildi sem hann kannaðist ekki við að

hafa séð áður og bjóst ekki við fiðrildum á þessum tíma árs. Hermann hafði samband við Náttúrustofu Vestfjarða og við nánari skoðun kom í ljós að fiðrildið er af ættinni Pieridae og heitir litli kálskjanni eða litla kálfiðrildi (Artogeia (Pieris) rapae (L.)). Þetta fiðrildi er algengt um alla evrópu. Lirfan lifir á káli og veldur ásamt frænda sínum, stóra kálskjanna eða stóra kálfiðrildi (Pieris brassicae L.), töluverðu tjóni. Fiðrildið berst hingað öðru hvoru en hefur ekki náð að festa sig í sessi. Fiðrildið hefur líklegast borist hingað sem púpa.

Í haust gaf Náttúrustofa Vestfjarða út skýrslu um Vatnakerfi Fljótavatns (Vatnakerfi Fljótavatns í Fljótavík á Hornströndum, fiskirannsóknir, vatnshita- og seltumælingar 1999-2001). Náttúrustofan var einnig með veggspjald um efnið á afmælisráðstefnu Líffræðifélagsins í nóvember 2004. Það hafa komið fyrirspurnir um að fá skýrsluna og höfum við orðið að ósk þeirra. Hægt er að nálgast skýrsluna og veggspjaldið hér fyrir neðan.

Dagana 15. – 16. apríl nk. verður haldin ráðstefna á Ísafirði sem ber yfirskriftina “Náttúra Vestfjarða og ferðamennska”. Þeir sem standa að þessari ráðstefnu eru: Ferðamálasamtök Vestfjarða, Fjórðungssamband Vestfirðinga, Atvinnuþróunarfélag Vestfjarða og Náttúrustofa Vestfjarða.

Eins og nafn ráðstefnunnar gefur til kynna verður þema hennar náttúra Vestfjarða og hvernig hægt sé að tengja hana ferðamennskunni á svæðinu þannig að hagsmunir ferðaþjónustuaðila og ferðamanna fari saman. Markmið ráðstefnunnar er að leitast við að svara mjög sértækum spurningum um náttúru og ferðamennsku, s.s. hvaða náttúrufyrirbæri eru á Vestfjörðum, hvar eru þau, hverjir vilja skoða þau, hvenær og hvað má það kosta.

Um er að ræða tveggja daga ráðstefnu, frá hádegi á föstudegi og fram til kl. 16 á laugardegi. Fyrirlesarar koma úr ýmsum áttum og munu fjalla um þetta málefni út frá mörgum sjónarhornum. Fyrirlestrarnir ná yfir allt sviðið, s.s. ferðaþjónusta, ferðamennska, markaðssetning, menning svæðisins, náttúruvísindi, rannsóknir, öryggi ferðamanna, aðgengi inn á svæðið og innan þess.

Opnuð hefur verið heimasíða ráðstefnunnar og er slóðin http://www.nave.is/ferdaradstefna Þar eru allar upplýsingar um ráðstefnuna að finna og einnig er hægt að skrá sig þar. Allar nýjar upplýsingar verða færðar inn á heimasíðuna jafnóðum og þær berast. Að auki veitir verkefnisstjóri ráðstefnunnar, Anna Guðrún Edvardsdóttir, upplýsingar í síma 456 7207, GSM 864 0332, netfang: arun@nave.is

Ragnar Edvardsson fornleifafræðingur hjá fornleifadeild Náttúrustofu Vestfjarða hefur fengið styrk úr Fornleifasjóði að upphæð 600 þúsund krónur fyrir verkefnið ,,Hvalveiðar Baska á Ströndum". Verkefnið verður unnið í samvinnu innlendra og erlendra stofnana. Af þátttökuaðilum má nefna Strandagaldur og NABO (North Atlantic Biocultural Organization).

Markmið verkefnisins er að hefja rannsókn á minjum hvalveiðimanna á tímabilinu frá 1500 til 1700. aldar. Meginmarkmiðið er að skapa grundvöll að frekari rannsóknum á minjum hvalveiðimanna frá þessum tíma og um leið öðlast betri skilning á eðli búsetu hvalveiðimanna á tímabilinu og hvernig samskiptum þeirra við íslendinga var háttað. Verkefnið mun reyna að setja fornleifafræði á minjum baskneskra hvalveiðimanna í víðara samhengi svipaðra rannsókna á Norður Atlantshafssvæðinu. Aðaláherslan er á efnislegum minjum eftir hvalveiðimenn á Íslandi og hvaða áhrif vera þeirra hafði á íslenskt samfélag.

Hunangsflugurnar eru að vakna. Katrín Gunnarsdóttir sá hunangsflugu á Þingeyri í morgun. Sennilega var þetta tegundin húshumla (Bombus lucorum), en það er ekki staðfest.

Glærur fyrirlestranna sem fluttir voru á ráðstefnunni "Náttúra Vestfjarða og ferðamennska þann 15. og 16. apríl sl. verða settar á vefinn á næstu dögum. Settir hafa verið fjórir fyrirlestrar inn á vefinn. Smellið á tengilinn "ferðaráðstefna" til að komast inn á síðuna.

Höggmyndasýning í Náttúrugripasafninu í Bolungarvík 1. – 16. maí 2005 (meira)

Guðjón Kristinsson opnar höggmyndasýningu í Náttúrugripasafninu í Bolungarvík

Sýningin verður opin frá 9 – 12 og 13 – 17 virka daga og 13 – 17 sunnudaga og annan í Hvítasunnu.

Á sýningunni eru höggmyndir úr tré sem unnar eru frá árinu 1997 og til dagsins í dag. Myndefni sýningarinnar er sótt í náttúru og mannlíf Vestfjarða sem er Guðjóni mjög hugleikið.

Guðjón er fæddur á Dröngum á Ströndum, sonur hjónanna Kristins Jónssonar og Önnu Guðjónsdóttur. Hann bjó í Bolungarvík í nokkur ár en síðan hann flutti burt hefur hann verið þar með annan fótinn.

Guðjón hefur unnið mikið að endurbótum í Ósvör, aðallega við endurhleðslu en hann hefur sérhæft sig í fornhleðslu. Hann hefur hlaðið m.a. stærsta grjótskúlptúr á Íslandi en sá er fyrir framan hús Orkuveitu Reykjavíkur, auk fjölda annarra verka.

Guðjón hefur alla tíð verið hagur á tré og hefur í frístundum teiknað og tálgað. Upp úr 1990 hóf hann nám í myndhöggi. Guðjón hefur m.a. lært hjá Gerhardt König, þýskum myndhöggvara sem bæði vinnur í tré og stein, Manuelu Covini sem er ítalskur myndhöggvari og málari og Einari Má Guðvarðarsyni myndhöggvara en hjá honum lærði Guðjón myndhögg í stein.

Guðjón hefur haldið nokkrar sýningar m.a. á Sólstöðuhátíð á Grænlandi.

Rostungur á Ströndum. Þann 11. júní sáu Reimar Vilmundarson og ferðafélagar rostung á Straumnesi við Bolungavík á Ströndum. Reynt verður að fá mynd af dýrinu og birta hana hér.

Dagur hinna villtu blóma er samnorrænn dagur þar sem flóruvinir veita leiðsögnu um villtan gróður. Dagur hinna villtu blóma verður haldinn á Íslandi og á hinum Norðurlöndunum sunnudaginn 19. júní árið 2005. Þann dag gefst fólki víðs vegar um landið kostur á að fara í tveggja tíma gönguferð um nágrenni sitt án endurgjalds, og fá leiðsögn um algengustu plöntur sem þar vaxa. Ýmsar stofnanir standa með flóruvinum að þessum degi á hverjum stað fyrir sig, Á Vestfjörðum er Náttúrustofa Vestfjarða samstarfsaðili flóruvina.

*Ísafjörður. Mæting við tjaldsvæðið í Tungudal kl. 13:00. Leiðsögn: Anton Helgason.

*Bolungarvík. Mæting við Stigahlíð kl. 16:00. Farið verður upp í Bólin. Leiðsögn: Anton Helgason.

*Hólmavík. Mæting við Upplýsingamiðstöðina á Hólmavík (við tjaldsvæðið) kl. 19:30. Farið verður um Borgirnar á Hólmavík. Leiðsögn Matthías Sævar Lýðsson.

Gönguferðir þessar eru ókeypis fyrir þátttakendur, og ekki þarf að tilkynna þátttöku fyrir fram, heldur aðeins mæta á auglýstum stað á réttum tíma. Vonast er til að hægt verði að bjóða upp á leiðsögn sem víðast um landið, en það fer þó eftir því hversu margir sjálfboðaliðar fást til að veita leiðsögn.

Komin er umhverfismatsskýrsla um fyrirhugaðan veg um Arnkötludal og Gautsdal í Hólmavíkurhreppi og Reykhólahreppi. Matsskýrslan verður auglýst formlega á morgunn (22. júní). Frestur til athugasemda er 3. ágúst (6 vikur) og úrskurðadagur 31. ágúst (10 vikur). Matsskýrslan mun liggja frammi til kynningar frá 22. júní til 3. ágúst 2005 á skrifstofum Hólmavíkurhrepps og Reykhólahrepps, í Þjóðarbókhlöðunni og hjá Skipulagsstofnun, Laugavegi 166, Reykjavík. Frestur til almennings til athugasemda er til 3. ágúst 2005.

Náttúrustofa Vestfjarða og Línhönunn hafa unnið þessa matskýrslu fyrir Leið ehf. Matskýrslan er á pdf formi og má nálgast hana hér fyrir neðan ásamt kortum sem fylgja henni (SD-01 til SD-012).

Umhverfis- og náttúruverndarnefnd Reykhólahrepps stendur fyrir almennri gönguferð um Teigsskóg við vestanverðan Þorskafjörð sunnudaginn 3. júlí 2005 kl. 13:00.

Starfsmaður Náttúrustofu Vestfjarða verður með í för og greinir frá náttúrufari svæðisins. Nánari upplýsingar um ferðina má sjá á heimasíðu Reykhóla (sjá fyrir neðan).

Rostungur (Odobenus rosmarus) sást í Arnarfirði 3. júlí. Hann var nálægt Hrafnabjörgum og má sjá myndir af honum hér fyrir neðan en Friðfinnur Sigurðsson tók myndirnar. Á Hornströndum sást rostungur 11. júní og gæti verið um sama dýr að ræða.

Rostungar flækjast stundum til Íslands og sást einn ungur við Papey fyrir austan árið 2000 og svo í Selvík á austanverðum Skaga haustið 2002*.

Umhverfis- og náttúruverndarnefnd Reykhólahrepps stóð fyrir gönguferð um Teigsskóg í Þorskafirði sunnudaginn 3. júlí. Á milli 60 og 70 manns tóku þátt í gönguferðinni. Ágætis veður var til gönguferðar en heldur mikill vindur til að hlusta á fuglasöng. Ekki sáust margar fuglategundir í ferðinni en einn ungur örn stillti sig fyrir ljósmyndatöku. Alls sáust 4 ernir og voru a.m.k. þrír þeirra ungir.

og þar verða birtar myndir fljótlega. Hér fyrir neðan eru nokkrar myndir úr ferðinni.

Náttúrustofa Vestfjarða er aðili að verkefninu "Vestfirðir á miðöldum". Á vegum verkefnisins stendur yfir uppgröftur á landnámsskála í Vatnsfirði. Þennan mánuð standa fornleifafræðingar frá Fornleifastofnun Íslands ses. í ströngu við uppgröftinn. Í tengslum við hann rekur Fornleifastofnun fornleifaskóla í Vatnsfirði. Um 11 nemendur frá ýmsum löndum eru í skólanum. Hluti af náminu felst í vettvangsferðum um Vestfirði. Farið verður í þrjár dagsferðir og var sú fyrsta farin sunnudaginn 3. júlí sl. Ekið var um Strandasýslu, ýmsar minjar og rústir skoðaðar. Farið var á Galdrasýningu á Ströndum og ferðinni lauk á Cafe Riis. Leiðsögumaður var Magnús Rafnsson. Náttúrustofa Vestfjarða sér um skipulagninu vettvangsferðanna og hefur umsjón með þeim.

Næsta ferð er áætluð sunnudaginn 10. júli og verða þá norðanverðir Vestfirðir skoðaðir. Þriðja og síðasta ferðin verður sunnudaginn 17. júlí og þá verður farið inn í Kaldalón.

Fornleifaskóli Vestfjarða fór í sína aðra vettvangsferð sunnudaginn 10. júlí. Nemendur heimsóttu Súðavík, Ísafjörð og Bolungarvík. Ekið var um Súðavík, þaðan var ferðinni heitið til Ísafjarðar þar sem nemendur skoðuðu m.a. Sjóminjasafnið í Neðsta - kaupstað og elstu hús bæjarins. Þaðan var haldið til Bolungarvíkur. Nemendur fengu leiðsögn um minjasafnið Ósvör og Náttúrugripasafn Bolungarvíkur. Að síðustu var ekið upp á Bolafjall en þaðan er stórkostlegt útsýni. Ferðinni lauk með því að nemendurnir snæddu kvöldverð saman.

Þriðja og síðasta ferðin verður farin sunnudaginn 17. júlí nk. og er ferðinni heitið inn í Kaldalón.

Nú eru margar hunangsflugudrotningar á ferli. Mest eru þetta húshumludrotningar (Bombus lucorum), sem eru að leita sér að dvalarstað fyrir veturinn. Drotningarnar leita því mikið í bílskúra og garðhýsi, en líka inn í íbúðarhús. Hunangsflugurnar eru meinlausar og stinga ekki nema að þær séu teknar með höndum. Einfalt er að fanga þær í dollur eða krukkur og fara með þær út.

Vestfjarða akademían í samstarfi við Menntaskólann á Ísafirði kynnir:

Jarle Reiersen sérfræðingur í sjúkdómum alifugla hjá yfirdýralæknisembættinu heldur fyrirlestur nk. mánudagskvöld 14.nóvember kl. 20:00 í sal Menntaskólanum á Ísafirði.

Fuglainflúensa breiðist nú hratt út í átt að Vestur-Evrópu. Fjölmiðlar fræða okkur um þróun mála frá degi til dags. Í erindinu verða rifjuð upp nokkur grundvallaratriði inflúensuveirunnar og fjallað um hvernig útbreiðsla fuglaflensunnar hefur þróast síðustu árin. Einnig verður fjallað um hvort þetta er vá sem hægt er að varast og hvernig hugsanlega megi verjast henni. Lögð verður áhersla á fuglaflensuna sem dýrasjúkdóm.

Allir velkomnir meðan húsrúm leyfir

Páfiðrildi (Inachis io) fannst í Bolungarvík í gær. Guðlaug Bernódusdóttir sá að heimiliskötturinn var að leika sér að einhverju og reyndist það vera páfiðrildi, en nokkuð laskað af leik kattarins. Páfiðrildi eru útbreidd í Efrópu norður til Skandinavíu og lifa á nettlum. Þau berast hingað næstum árlega en aldrei mörg í einu. Fiðrildin eru ekki talin berast með vindum heldur koma með varningi. Páfiðrildið í Bolungarvík hefur líklega borist með jólatré (Normansþin) frá Danmörku.