vestfirskar fréttir | bb.is | 23.10.02 | 16:43



„Snjótæknilegir ráðgjafar“ meti áhrif þess að sleppa leiðigarði
 

Framkvæmdasýsla ríkisins vill að skoðað verði hvort hægt sé að draga úr hættu á óheppilegri snjósöfnun við fyrirhugaðar snjóflóðavarnir í Bolungarvík með því að sleppa leiðigarði undir vestanverðu Traðargili og lengja þess í stað þvergarð varnanna. Til þess að athuga þetta vill Framkvæmdasýslan að fengnir verði „snjótæknilegir ráðgjafar“, eins og komist er að orði í bréfi sem sent var Bolungarvíkurkaupstað og lagt fyrir bæjarráð í gær. Í bréfinu er lagt til að ráðgjafarnir verði beðnir um að meta hversu mikið þyrfti að lengja þvergarð snjóflóðavarnanna og hver hæð framlengingarinnar þyrfti að vera.

Undanfari þessa máls er sá að einn íbúi í Bolungarvík gerði athugasemd við umhverfismat sem unnið var vegna fyrirhugaðra framkvæmda og hafði áhyggjur af snjósöfnun við varnargarðinn. Verkfræðistofa Siglufjarðar athugaði líklega snjósöfnun og komst að því að búast mætti við því að nokkur snjór safnaðist við báðar hliðar leiðigarðs undir Traðargili, enda sé ætlunin að hann liggi þvert á ríkjandi vindáttir.