vestfirskar fréttir | bb.is | 23.04.03 | 11:37



Mandarínendur gleðja gesti og gangandi á Suðureyri
 

Súgandafjörður er vinsæll áfangastaður farfugla og þar hefur oft mátt sjá útlenda flækingsfugla á vappi. Undanfarna tvo daga hafa tvær endur haldið sig við tjörnina á Suðureyri og þykjast glöggir fuglaáhugamenn þekkja að þar séu á ferðinni mandarínendur. Er óhætt að segja að þessar endur séu komnar langt frá náttúrulegum heimkynnum sínum sem eru í skógum Kína, Japans og austurhluta Síberíu.

Þó þær séu þekktar fyrir að fljúga langar vegalendir (vitað er til þess að þær hafi flogið um 800 km á einum sólarhring), kann viðkoma andanna í Súgandafirði að eiga sér eðlilega skýringu. Talsvert hefur verið um innflutning á mandarínöndum til Vesturlanda enda eru þær eftirsóttar hjá fuglaræktendum og þykja sömuleiðis prýði í almenningsgörðum og dýragörðum. Á þetta einkum við um Bretlandseyjar og þar er til frjáls stofn mandarínanda sem komnar eru af ræktuðum öndum. Má því teljast líklegt að fuglarnir tveir á Suðureyri séu komnir þaðan frekar en frá Austurlöndum fjær.

Um lífshætti mandarínandarinnar er það helst að segja að hún heldur sig aðallega við skógartjarnir og straumharða læki þar sem hún lifir einkum á vatnaplöntum, hrísgrjónum og öðru korni. Talið er að stofninn í Asíu sé um 20 þúsund fuglar en eins og svo margar aðrar fuglategundir í heiminum hefur mandarínöndin átt í vök að verjast þar sem maðurinn hefur verið að leggja undir sig sífellt meira af þeim landssvæðum sem hún heldur sig á. Það hefur þó komið mandarínöndinni til bjargar að hún þykir einstaklega bragðvond og er því ekki veidd til matar.