Náttúrustofa Vestfjarða er í samvinnu við hóp fuglaáhugamanna sem senda stofunni mikilvægar upplýsingar um komutíma fugla ásamt fréttum af áhugaverðum flækingsfuglum. Þar sem við getum ekki verið á öllum stöðum erum við þakklát fyrir þessa aðstoð og viljum hvetja fólk til að senda okkur upplýsingar.
Undanfarið hafa borist ábendingar um komu fugla á svæðið. Samkvæmt þessum upplýsingum kom heiðlóa að Kirkjubóli við Steingrímsfjörð í gær. Aðrar tegundir sem sáust í síðustu viku og um páskana eru eyrugla á Hólmavík, gráspör á Ísafirði, nokkrar heiðargæsir og margæsir í Skutulsfirði ásamt því að teista sást koma nálegt landi í fjöru við Húsavík í Steingrímsfirði. Þá hefur undanfarið verið að bætast í hóp þeirra fugla sem hafa að hluta til haft vetursetu á svæðinu. Hér má til dæmis nefna tegundirnar tjald, stelk, lóm, álft, grágæs og hettumáf.
Náttúrustofa Vestfjarða | Aðalstræti 12 | 415 Bolungarvík | kt 610397 2209 | sími: 456 7005 | netfang: nave [hjá] nave.is
