Séð yfir Arnarfjörð frá Hálfdán

Verkefnið um „Sjávartengda ferðaþjónustu á Patreksfirði, Tálknafirði og Bíldudal er lokið og skýrsla komin út um efnið.

Markmið verkefnisins er að sjávarþorpin Patreksfjörður, Tálknafjörður og Bíldudalur sem öll eru á sunnanverðum Vestfjörðum verði áfangastaðir með áherslu á upplifun í sjávartengdri ferðaþjónustu til styrkingar á ímynd, nýsköpun fyrirtækja og atvinnuþróunar á svæðinu. Framkvæmdar voru grunnrannsóknir til að greina sérstöðu þorpanna og svæðisins í heild til uppbyggingar á sjávartengdri ferðaþjónustu.

Verkefnið er grunnrannsókn á svæði sunnanverðra Vestfjarða sem hefur ekki verið rannsakað sem eitt svæði áður m.t.t. sjávartengdrar ferðaþjónustu. Æskileg niðurstaða er að verkefnið bæti ímynd þorpanna og svæðisins í heild og það efli sjálfsmynd íbúa, stolt á uppruna og sögu. Einnig að skapa jákvæðara viðhorf gagnvart atvinnuuppbyggingu í sjávartengdri ferðaþjónustu á svæðinu. Tilgangur verkefnisins var m.a. að fá ferðamenn til að dvelja lengur á svæðinu og skapa þannig auknar gjaldeyristekjur.

Niðurstöður verkefnisins benda til að stór hluti erlendra ferðamanna hafi áhuga á að dvelja lengur á svæðinu verði framboð á sjávartengdri ferðaþjónustu aukið. Einnig benda niðurstöður til þess að samsetning erlendra ferðamanna á suðursvæði Vestfjarða sé önnur en þeirra sem sækja aðra hluta Vestfjarða.

Haldin verða erindi um niðurstöður verkefnisins á veitingarstaðnum Hópinu á Tálknafirði þann 14. febrúar n.k. og þann 28. febrúar í Vísindaporti Háskólaseturs Vestfjarða.

Að verkefninu stóðu Náttúrustofa Vestfjarða og Atvinnuþróunarfélag Vestfjarða. Verkefnið er styrkt af AVS rannsóknarsjóði í sjávarútvegi.

Hér má sjá skýrsluna í heild sinni.